
Сүүлийн үед Монголчууд бидний хамгийн дуртай зүйл нь мөнгө, эд хөрөнгө болоод байгаа билээ. Мөнгөгүй л бол юу ч бүтэхгүй мэт, Эд хөрөнгийг бие биенээсээ илүүрхэхийн зиндаа болгох сэтгэлгээтэй болчихсон энэ цагт тэр дурлаад байгаа мөнгийг, эд хөрөнгийг нь хаанаас яаж олох ёстой юм бэ гэсэн нэг асуудал урган гарч байгаа юм. Тэгэхээр мөнгийг, эд хөрөнгийг хэн хийдэг билээ, мөнгийг, эд хөрөнгийг хэн хэрэглэдэг билээ гэдгийг эхлээд бодоод үзэх хэрэгтэй. Мэдээж хэн бэ гэхээр хүн шүү дээ. Тэрнээс биш аливаа нэг амьтан мөнгө, эд хөрөнгийг бий болгож хэрэглэдэггүй биз дээ. За ингээд хүн гэдэг нь тодорхой болчихлоо. Нэгэнт хүн өөрийнхөө хийсэн бүтээсэн зүйлийг олохгүй хайгаад байна гэдэг туйлын утгагүй асуудал болж таарч байна уу? За яагаад хүний бүтээсэн зүйл хүнээс зугтаах болов? Гэсэн ба нэг асуулт гарч ирлээ. Энэ асуултаас эхлээд би өөрийн санаа бодлоо та бүхэнтэй хуваалцах гэсэн юм.